Oer Monique Reitsema - Efkes foarstelle

Ik bin Monique, op en top Friezinne; wenje yn Burdaard en hâld fan it libben en de minsken om my hinne! Yn myn (wurk)libben haw ik altyd rjochte west op minsken. Foardat ik yn myn wurk as terapeute myn passy fûn, haw ik wurke yn ferskillende sektoaren: hoareka, soarch en saaklike tsjinstferliening.

It libben is foar my in grutte learreis. Ik bin ek dizze reis mei fallen en opstean begûn en alle dagen lear ik wer. De hobbels op myn paad wiene heftich, ferlies fan dierberen, ferlies fan baan, skieding; yn dy dagen koe ik it net allinnich. Ik kaam “mysels nochal tsjin”. Ik haw help hân fan terapeuten en psychologen om mear ynsjoch yn mysels te krijen en kaam hieltyd tichter by mysels en hoe't ik myn libben ynrjochtsje wol.

Underwilens sit ik yn rêstich farwetter en bied ik sokke help graach oan oaren. Myn praktyknamme MoRe You stiet letterlik foar “mear dy”. Mear út dysels helje en tichter by dysels komme. Myn grutte passy is minsken helpe yn harren syktocht nei harsels. Tegearre de reis te meitsje en blokkaden oerwinne. Wer de fleur en wille fan it libben fiele! Alle dagen genietsje fan moaie en soms lytse dingen. Feiligens en betrouwen binne de basis dêr't ik út wurkje. Alles mei sein wurde. Skamte is net nedich.

Ik wurkje fan respekt fan wjerskanten, iepenheid nei inoar en transparânsje. Dy wearden wurde stipe troch de beropsferieningen dêr't ik my by oansletten haw. Ik stean iepen foar minsken fan ferskillend komôf, kultuer en aard. Ik ûntwikkelje mysels en spesjalisearje mysels fierder yn myn fakgebiet, sadat ik hieltyd better oanslute kin op helpfragen. Ik wurkje op ferskate lokaasjes, yn Drachten, Ljouwert en Burdaard, mar ek in kuier yn in natuergebiet heart ta de mooglikheden. Wichtich is datsto dy noflik fielst! Yn myn frije tiid bin ik graach op reis; leafst nei fiere lannen mei nije kultueren en aventoer. Ik hâld fan it boergondyske libben en genietsje fan minsken om my hinne. Regelmjittich organisearje ik edukative en kreative reizen nei (fiere) oarden om inoar kennen te learen en mei-inoar in moaie tiid te hawwen!

Wês wolkom

Ast graach mei my oan de slach wolst, dan nûgje ik dy út om kontakt mei my op te nimmen. Ik fertel dy graach wat de mooglikheden binne en meastal slagget it om op koarte termyn in earste ôfspraak yn te plennen.

- Monique